Conceyu Abiertu

El llanzamientu del Foru Social Mundial nel añu 2000 fíxose nel periodu inicial de xubida y medría rápida del movimientu «antiglobalización» baxo l'impactu de les movilizaciones de Seattle en payares de 1999. Nesti contestu nació la idea del Foru Social Mundial, a manera de contrapuntu al Foru Económicu de Davos.

El contestu internacional en que'l Foru se desenvolvió foi camudando abondo dende l'añu 2001. Nel tiempu depués de Seattle, el movimientu vivió un proceso de medría mui fuerte hasta les movilizaciones contra'l G-8 en Xénova en xunetu de 2001 y los atentaos del 11 de setiembre en Nueva York. Depués de delles duldes de primeres, en que'l movimientu paecía que perdiere fuelle, la etapa nueva caracterizóse pola centralidá que garró la llucha contra la “guerra global permanente”, que tuvo'l so cénit nes protestes del añu 2003 contra la invasión d'Irak. Nos últimos tres o cuatro años entróse nuna fase nueva marcada por una pérdiga de visibilidá de les movilizaciones internacionales “antiglobalización” y de la so capacidá aglutinadora y unificadora, nun contestu d'auxe y multiplicación de les lluches concretes frente al neolliberalismu y de más dispersión sectorial y de “nacionalización” de les mesmes

El FSM foi evolucionando acordies cola coxuntura política y de la movilización internacional. Depués d'una primer etapa de xuba, d'aumentu de la so visibilidá y de cada vez más capacidá d'atracción, el Foru pasa anguaño per una crisis de perspectives y un futuru inciertu. El FSM nun quedó al marxe del refluxu actual del movimientu “antiglobalización” y de les protestes internacionales por cuenta de les contra-cumales. Anque nun perdiere poder de convocatoria estrictamente (cuestión, otra manera, mala de midir por culpa de les sos rotaciones xeográfiques), esperimentó una mengua del so impactu y influencia y de la so condición de referente internacional.

(Del llibru "El Futuro del Foro Social Mundial", Ed. Ícaria)

La charla va facese nos llocales del Conceyu Abiertu (Cai La Gascona 12, Baxu A, Uviéu) el vienres 11 d'abril a les  20:00 hores  y va tener como titulu "El movimientu antiglobalización en perspectiva"

Va intervenir Raúl Camargo, miembru d'Espacio Alternativo y ún de los promotores del Foro Social de Madrid.